كل عيادة ليها طريقتها في المواعيد. فيه دكتور شغّال بمواعيد مظبوطة بالدقيقة، وفيه عيادة الناس بتيجي فيها بالدور، وفيه اللي بيفضّل يسمع من المريض الأول وبعدين يحدد له ميعاد. عشان كده الحجز أونلاين مع site4u مش طريقة واحدة مفروضة عليك. هو جزء من باقة «نظام» والباقات اللي فوقها، وإنت بتختار الطريقة اللي تمشي مع عيادتك.
تلات طرق للحجز، وإنت تختار
من إعدادات الحجز في لوحة التحكم بتختار طريقة عيادتك، وتقدر تغيّرها بعدين:
- مواعيد محددة: المريض يختار اليوم والساعة الفاضية من صفحة الحجز في موقعك، والميعاد بيتحجز على طول.
- بالدور: المريض يختار اليوم وياخد رقم. ولو حابب تحدد عدد الأرقام في اليوم، أول ما تخلص الصفحة بتقوله يختار يوم تاني.
- طلب وإنت تأكد: المريض يختار اليوم ويبعت طلب، وإنت تكلّمه وتتفقوا على الساعة.
في التلات طرق المريض مش محتاج يعمل حساب ولا ينزّل تطبيق. بيكتب اسمه ورقم موبايله ويحجز.
ولو عندك أكتر من دكتور أو كرسي أو أوضة، ولكل واحد مواعيده، ده موجود في «نظام بلس».
قايمة الاستقبال: اليوم كله قدامك
كل الحجوزات بتتجمع في قايمة واحدة لليوم في لوحة التحكم، فالاستقبال يعرف مين جاي وإمتى من غير كشكول ولا ورق متلخبط. ومع كل حجز تقدر:
- تعلّم إنه وصل، وبعدين إنه خلص، أو إنه مجاش.
- تأكد الطلبات اللي مستنية رد، أو تلغي حجز اتلغى.
- تضغط «فكّره على واتساب»، فيتفتح واتساب برسالة تذكير جاهزة فيها اسم المريض واليوم والساعة أو رقم دوره، وتبعتها بضغطة. التذكير ده مش أوتوماتيك: بيتبعت لما إنت أو الاستقبال تبعتوه.
ولو حد جه من غير حجز؟ الاستقبال يسجّله من نفس الصفحة إنه وصل، حتى لو اليوم باين مليان على الموقع. ولو عيادتك شغّالة بالدور، بياخد الرقم اللي بعد آخر رقم اتدّى في اليوم ده.
الزيارات كل شهر بالأرقام
في صفحة الزيارات بتشوف كل شهر لوحده: كام مريض جه، وكام واحد مجاش، وكام حجز اتلغى، وكام حجز اتعمل من الموقع، ومن اللي جم كام واحد جه من غير حجز. وتحت الأرقام دي بتلاقي مين جه ومين مجاش في كل يوم، وكمان لكل دكتور أو كرسي لو عندك أكتر من واحد.
الأرقام دي بتجاوبك على أسئلة بسيطة بتفرق في شغل العيادة: أنهي أيام الزحمة فيها أكتر، وقد إيه في ناس بتحجز ومبتجيش، والموقع بيجيبلك حجوزات فعلًا ولا لأ.
وكل رقم موبايل حجز عندك بيبقى ليه ملف بسيط: الاسم والرقم وكل حجوزاته، وكام مرة جه وكام مرة مجاش.
رقم الملف بتاعكم، ومفيش أي بيانات طبية
لو عيادتك عندها نظام تاني أو كروت ورق بأرقام ملفات، تقدر تشغّل خانة «رقم الملف عندكم» من إعدادات الحجز. الاستقبال يكتب رقم ملف المريض على كل زيارة، وبعدين تدوّر بالرقم ده في صفحة الزيارات وتلاقي كل الزيارات اللي عليه. الرقم بيتكتب على الزيارة نفسها مش على ملف الموبايل، فلو أم وابنها بيحجزوا من نفس الموبايل، كل واحد بيفضل برقم ملفه.
الخانة دي بتقبل أرقام وحروف إنجليزي بس، ولو حد كتب فيها رقم قومي بالغلط بترفضه.
وده الأهم:
هنا المواعيد والزيارات بس. التشخيص والعلاج والروشتات ونتايج التحاليل مكانها نظام عيادتك أو ورقها، مش هنا.
مفيش ولا شاشة بتسألك عن تشخيص أو علاج أو دوا. حتى خانة الملاحظات في ملف المريض معمولة للمواعيد بس، زي «بيفضّل الصبح» أو «الأحسن نكلّمه واتساب». وده مقصود: بيانات مرضاك الطبية بتفضل عندك، والنظام مش بيطلبها منك في أي مكان.
عايز تشوف الحجز ده في عيادتك؟
الحجز أونلاين جزء من باقة «نظام» والباقات اللي فوقها، وإحنا بنجهّزه ونشغّله لعيادتك مع الموقع. شوف الباقات وقارن بينها، أو كلّمنا واحكيلنا عيادتك ماشية إزاي، ونقولك أنهي طريقة حجز تناسبها.